Ералы Жансұр Нұралыұлы

Ералы Жансұр Нұралыұлы

Мен, Ералы Жансұр Нұралыұлы, Қазақстан Республикасының ко�...

Мен, Ералы Жансұр Нұралыұлы, Қазақстан Республикасының колледж студенттері арасында өтетін «Қазақстан Республикасының Топ 100 студенті» байқауына өз үміткерлігімді үлкен жауапкершілікпен, әрі зор сеніммен ұсынамын. Бұл байқау – тек білім мен жетістікті саралайтын алаң ғана емес, жалынды жастардың арманы мен мақсатын тоғыстыратын, болашақ көшбасшыларды айқындайтын мәртебелі жоба деп білемін. Сондықтан, мен үшін бұл – өзімді таныту емес, еліме деген адалдығым мен еңбегімді дәлелдеу мүмкіндігі. Қазіргі таңда Мағжан Жұмабаев атындағы жоғары колледжінің «Бағдарламалық қамтамасыздандыруды құрастырушы» мамандығы бойынша 2-курс студентімін. Сандық технологиялар мен заманауи бағдарламалау тілдерін меңгеру арқылы цифрлық әлемнің қыр-сырын игеріп келемін. Сонымен қатар, колледждің өзін-өзі басқару ұйымының президенті ретінде студент жастардың бастамаларын қолдап, олардың үні мен пікірін ортақ іске ұштастырудамын. Көшбасшылық – мен үшін билік емес, сенім мен жауапкершілік. Елімізде жүзеге асырылып жатқан жаңашыл бастамалар жастарға үлкен серпін беруде. Қазақстан Республикасының президенті Қасым-Жомарт Тоқаев ұсынған «Адал азамат» біртұтас тәрбие бағдарламасы адалдық пен әділдікті өмірлік ұстанымға айналдыруды көздейді. Мен «Адал ұрпақ» ерікті клубының мүшесі ретінде осы құндылықтарды дәріптеп, қоғамда парасаттылық мәдениетін қалыптастыруға атсалысып келемін. Өйткені, адалдық – табыстың іргетасы, әділдік – сенімнің бастауы. 2026 жылдың Цифрландыру және жасанды интеллект жылы болып жариялануы – болашаққа бағытталған тарихи шешім. Жасанды интеллект пен инновация дәуірінде бәсекеге қабілетті болу – әр жастың міндеті. Мен таңдаған мамандығым арқылы елімнің цифрлық дамуына үлес қосып, технология мен адамзат игілігін ұштастырғым келеді. Спорт пен өнер де өмірімнің ажырамас бөлігі. Қазақ күресі, тоғызқұмалақ, дзюдо және еркін күрестен жарыстарға қатысып, жүлделі орындарға ие болдым. Өнер мектебінде ұлттық аспаптарды меңгеріп, рухани дүниемді байыттым. Бұл жетістіктер мені табандылыққа, еңбекқорлыққа және төзімділікке тәрбиеледі. Сонымен қатар, Қазақстан халқы Ассамблеясы жанындағы «Ассамблея жастары» ұйымы мен «Помощь рядом» еріктілер қозғалысы құрамында қоғамдық жұмыстарға белсене араласудамын. «Таза Қазақстан» акциясы аясында туған өлкеміздің тазалығы мен көркеюіне үлес қосу – мен үшін азаматтық борыш. Бұл байқау – жаңа белеске бастар жол. Мен бар білімім мен күш-жігерімді жұмсай отырып, елімнің өркендеуіне адал қызмет етуге дайынмын. Жарқын болашаққа сеніммен қадам басқан жас ретінде ел үмітін ақтау – менің басты мақсатым.

Автор:
Сарсенова  Шолпан  Болатқызы
редактор
Страница создана
17.11.2026
Дата обновления:
17.11.2026